کندهار کې څه دپاسه پنځه زره مټریک ټنه اضافي غنم پېرل او زېرمه کېږي
د امیرالمؤمنین حفظه الله د فرمان له مخې، د کندهار له ولایت څخه پنځه زره او ۱۰ مټریک ټڼه غنم پېرل او زېرمه کېږي.
ددغو غنمو د پېرلو او زېرمه کولو په پار د کندهار دکرنې، اوبولګولو او مالدارۍ رییس مولوی فضل الباري فضلي په مشرۍ غونډه دائره شوه، چې په کې دکرنې وزارت د استازو ترڅنګ د کندهار ولایت مقام، مستوفیت، صنعت او سوداګرۍ ریاست استازو هم ګډون درلود.
ددې غونډې په ترڅ کې د کندهار دکرنې، اوبولګولو او مالدارۍ رییس مولوی فضل الباري فضلي وویل، چې د امیر المؤمنین حفظه الله د فرمان له مخې د کندهار ولایت د ولسوالیو او ناحیو له بزګرانو، شرکتونو او سوداګرو څخه پنځه زره او ۱۰ مټریک ټنه اضافي غنم پېرل او زېرمه کېږي.
ښاغلی فضلي وویل، چې د یادو غنمو د زېرمه کولو موخه د بزګرانو د اضافي غنمو خوندي کول، د طبیعې پیښو او وچکالیو په وړاندې د غریبو، بیوزلو او ناچارو خلکو سره مرستې او لاس نیوی ده.
په همدې حال کې د کرنې وزارت استازو د اضافي غنمو د پېر او زېرمه کولو بهیر په اړه وویل: « د کندهار دکرنې ریاست، سیلو، صنعت او سوداګرۍ، مستوفیت او د لایت مقام د استازو په شتون کې د بیې ټاکنې او تسلیم ګیرۍ کمېټې ګمارل کېږي، ترڅو ددغو غنمو د تدارکاتي، بیې ټاکنې، پېر او زېرمه کولو لړۍ پیل شي.»
د کرنې، اوبولګولو او مالدارۍ وزارت چارواکي په پام کې لري، چې په ولایتونو کې له کروندګرو څخه اضافي غنم وپېري او په ګودامونو کې یې زېرمه کړي، ترڅو په بېړنیو حالاتو او که په بازار کې د غنمو او وړو بیه وړه شي، بېرته یې بازار ته وړاندې کړي، ترڅو د غنمو او وړو نرخونه کنټرول شي.
