د اراضۍ لوی رییس د هلمند دکرنې او ورسره مل پلاوي سره وکتل
۱۸ زمری ۱۴۰۳ه.ش
۴ صَفَر المُظَفَّر ۱۴۴۶ه.ق
دکرنې، اوبولګولو او مالدارۍ وزارت د ځمکو چارو لوی رییس مولوی محمود مظلوم د خپل کار په دفتر کې د هلمند دکرنې له رییس مولوي نیازمحمد وهاج او مل پلاوي سره په کتنه کې پر بېلابېلوموضوعاتو خبرې اترې وکړې.
ددغه کتنې پر مهال د هلمند د ځمکو تخنیکي آمر، د اجارو او پانګونې مدیر، د اجارو او قراردادونو مدیر او د حفظیې مدیر هم شتون درلود.
په دغه کتنه کې دهلمند ولایت د کرنې رییس د اجارو د نوې کړنلارې، په هلمند کې د امارتي ملکیتونو له مدرکه د باقیاتو د تصفیې، د امارتي ځمکو څخه د مؤثرې ګټې اخستنې، د غصب شویو امارتي ځمکو د استرداد او ګڼو نورو برخو کې یو شمېر ستونزې او وړاندیزونه د ځمکو لوی رییس سره شریک کړل.
د هلمند دکرنې رییس همدارنګه هلمند کې د ځمکو تخنیکي آمریت د کدستري او مساحتي نقشو، ددفتر اساسونو، د مرکز لښکرګاه او ولسوالیو د ځمکو لیست د مالکینو او نورو اړینو سندونو په واک کې ورکولو غوښتنه وکړه، ترڅو په یادو مواردو کې یې پرتې ستونزې حل شي.
په ورته وخت کې د راضۍ لوی رییس د هلمند دکرنې رییس د وړاندیزونو او ستونزو تر اورېدو وروسته وویل، چې د اراضۍ لوی ریاست د هلمند د کرنې ریاست ټولې هغه ستونزې او غوښتنې چې په بېلابېلو برخو کې یې لري د حل په برخه کې یې هر راز همکارئ ته چمتو دی. هغه د ځمکو لوی ریاست ټولو اړونده مسؤلینو ته سپارښتنه وکړه، ترڅو د هلمند د کرنې ریاست هغه غوښتنې چې په کتبي ډول یې ددې ادارې څخه کړي دي چمتو او په واک کې ورکړي.
دغه راز د هلمند دکرنې رییس او ورسره مل پلاوي وروسته د ځمکو لوی ریاست اړوند د اجارې او پانګونې رییس ملا عبدالظاهر آمین او د جیودیزی، کدستر او قبالو رییس مولوي سعیدالرحمن مظهري سره جلاجلاکتنې وکړې، هغوی په خپلو برخو کې د هلمند دکرنې رییس ته د بشپړې همکارۍ ډاډ ورکړ او د اړتیا وړ اسنادو د چمتو کولو او په واک کې ورکولو ژمنه وکړه.
