د نه انلوس مؤسسې مشرتابه سره د ننګرهار مرستیال والي او کرنې رییس لیدنه
۱ لیندۍ ۱۴۰۲ه.ش
۹جُمَادَى الأول ۱۴۴۵ ه.ق
د ننګرهار مرستيال والي مولوي سعيد احمد بنوري، په داسې حال کې چې د ننګرهار دکرنې ریيس مولوي عبدالستار محمد او د کډوالو چارو ریيس حاجي باز محمد عبدالرحمن هم حضور درلود د نه انلوس مؤسسې مشرې سوسانا فيورټي او همکارانو سره يې د لیدنې په ترڅ کې د کرنې او بېرته راستنېدونکو کورنيو سره د مرستو په موخه خبرې اترې وکړې.
په دې کتنه کې د ننګرهار مرستیال والي د بېرته راستنو شويو کورنيو او بزګرانو ستونزې او غوښتنې شريکې کړې او وړانديز يې وکړ ترڅو بېرته راستنو شويو کورنيو ته د بېړنيو مرستو ترڅنګ د کاروبار زمينه برابره کړي.
نوموړي وويل، چې په دې ولايت کې کوکنار صفر شوی او بايد بزګرانو سره د کوکنارو بديل مرستې تر سره شي، ترڅو په خپلو پښو ودرېږي او په راتلونکې کې حلال او ګټور کښتونه وکري.
هغه د يادې مؤسسې له مسئولينو مننه وکړه، چې په دې ولايت کې کار کوي او په ټولو قانوني چارو کې د ښې همکارۍ او همغږۍ ډاډ ورکړ.
د کډوالو چارو رییس حاجي بازمحمد عبدالرحمن بېرته راستنو شويو کورنيو ته د نغدې او خوراکي مرستې ورکړې وړانديز وکړ او غوښتنه يې وکړه ترڅو دوی ته واړه کاروبارونه جوړ شي.
په ورته وخت کې د ننګرهار د کرنې رییس مولوي عبدالستار محمد د کورنيو باغچو، مېرمنو ته د غواګانو، اوزو او چرګانو ورکړې، د سبو وچولو ماشينونونو وېشلو، د سبو او لبنياتو پروسس وسايلو ورکړې او مېرمنو ته په ياده برخه کې د روزنې په موخه غوښتنې وکړې.
په همدې حال کې، د نه انلوس مؤسسې عمومي مشرې سوسانا فيورټي ډاډ وښوده چې په غوښتنو به يې غور وکړي او د امکاناتو له مخې به بېرته راستنېدونکو کورنيو او بزګرانو سره لازمې مرستې تر سره کړي.
نوموړې د يادو مرستو څرنګوالي، اړتياو، ستونزو او غوښتنو په اړه مسئولينو سره خبرې وکړې او ډاډ يې څرګند کړ، چې په خپله برخه کې به لازمه همکاري وکړي.
