کندهار کې یوشمېر بزګران روزل کېږي
۲۸ لړم ۱۴۰۲ه.ش
۶ جُمَادَى الأول ۱۴۴۵ ه.ق
د کندهار دکرنې، اوبولګولو او مالدارۍ ریاست وایي، چې ددې ولایت د مرکز په ګډون په ټولو ولسوالیو کې د کرنې ادارې اړوند دبوټو ساتنې او ترویج مدیریت کارکوونکو لخوا د څارویو، بڼونو او بوټو د افتونو او ناروغیو د مخنیوي او کنټرول په برخه کې بزګرانو ته په عملي او نظري ډول زده کړې ورکول کېږي.
د کندهار دکرنې، اوبولګولو او مالدارۍ رییس مولوی محمود مظلوم وویل، چې د بزګرانو د وړتیالوړولو په پآر د کندهار دکرنې ریاست فني او مسلکي کارکوونکو له خوا د دې ولایت په کچه د عامه پوهاوی کمپاین پی شوی دی. ښاغلي مظلوم وویل، چې ددې کمپاین په ترڅ کې به د یاد ریاست مسلکي کارکوونکي ددې ولایت د مرکز په ګډون د ټولو ولسوالیو کلیو کې به بزګرانو ته د کرکیلي او مالدارۍ اړوند عامه پوهاوی ورکړي.
د کندهار دکرنې رییس وویل، چې یاد کمپاین د کندهار د ارغنداب ولسوالی څخه پیل شوی دی، چې په ترڅ کې یې د ارغنداب په بېلابېلو کلیو کې یوشمېر بزګران، بڼوال او مالداران روزل شوي دي.
په همدې حال کې یاد تخنیکي ټیم د کندهار ولایت د ارغنداب ولسوالی په بازار کې د حیواني او نباتي درمل پلورنځیو او کلینیکونو څخه هم څارنه وکړه، چې ددې څارنې په ترڅ کې یوشمېر تروخت تېر درمل راټول او اړوندو چارواکو ته سپارښتنه وشوه، چې د بېکفیت او تر وخت تېر درملو پېر-پلور څخه دې په کلکه ډډه وکړي او درمل پلورنځۍ د قانوني جواز ترڅنګ باید مسکلي کسان ولري.
