پکتیا کې د څه باندې یو میلیون امریکایي ډالرو په ارزښت ۹۱۴۷ تنو ته د کار زمینه برابرېږي
۷ وږی ۱۴۰۲ه.ش
۱۲ صَفَرُ المُظَفَّر ۱۴۴۵ه.ق
د پکتیا ولایت د کرنې، اوبولګولو او مالدارۍ ریاست په اډانه کې د افغانستان لپاره د ناروې کمېټې په تخنیکي او د خوړو او کرنې نړیوالې ادارې په مالي ملاتړ د څه باندې یو میلیون امریکايي ډالرو په ارزښت ددې ولایت په مرکز ګردیز، احمدآبا، سیدکرم او زرمت ولسوالیو کې ۹۱۴۷ تنو ته د کار زمینه برابرېږي، چې یاد شمېر کاریګر به ۲۴ سیمو کې ۳۳۵۳۳۹ ټرینچونه( کاړي) اوباسي، په ۶۰ کوچنيو بندونه(چک ډیمونو) او په ۶۷ ټولنیزو ساختمانونو کې به کار کوي.
یاده پروژه د پکتیا ولایت د حبیب کلا په سیمه کې پیل شوه، چې پکې د پکتیا د کرنې، اوبولګولو او مالدارۍ رییس الحاج مولوي عبدالرؤف سعید، د ښار جوړونې رییس مفتي عبیدالله، د افغانستان لپاره د ناروې کمېټې د بشري مرستو مسوول رحمت خان، قومي مشرانو او کاریګرو ګډون کړی وو.
د پکتیا دکرنې رییس مولوی عبدالرؤف سعید په خپلو خبرو کې په پکتیا ولایت کې د یادې پروژې پلي کېدل اړین وبلل او زیاته یې کړه، چې دکار په مقابل کې د پیسو وېش دغه پروژه چې له مخې به یې سلګونه زره ټرینچونه ایستل کیېږي، د اوبو په زیاتوالي او د اوبو د سرچینو په ښه والي کې به رغنده رول ولوبوي، نوموړي په خپلو خبرو کې له خلکو وغوښتل، چې د یادې پروژې ښه تطبیق ته ځانګړې پاملرنه وکړي، همدا ډول یې په یاده برخه کې د افغانستان لپاره د ناروې کمېټې د کړنو ستاینه هم وکړه.
په پای کې د افغانستان لپاره د ناروې کمیټې د بشري مرستو مسوول رحمت خان په خپلو خبرو کې په پکتیا ولایت کې د افغانستان لپاره د ناروې کمیټې د ترسره شویو کړنو یادونه وکړه، نوموړي وویل چې د پکتیا ولایت په ټولو ولسوالیو کې یې مختلفې پروژې پلې کړي او ځینې نورې یې تر کار لاندې دي، چې پکې د غنمو اصلاح شویو تخمونو او کیمیاوي سرو، حیواني خوراکې، کرنیزو وسایلو او د سبو تخمونو وېش شامل دي، نوموړي زیاته کړه چې د کار په مقابل کې د پیسو د وېش په دغه پروژه کې ۹۱۴۷ تنو ته د شلو ورځو کاري فرصت برابرېږي، چې د هرې ورځې کار په بدل کې د ۵ ډالرو معادل افغانۍ ورکول کېږي، نوموړي په پای کې د اوبو د مدیریت او د وچکالۍ د مخنیوي په برخه کې د واټرشیډونو جوړول حیاتي پروژه وبلله.
