ننګرهار کې د بزګرانو د ستونزو حل او هڅونې په پار ولسي ګروپونه جوړ شول
٢۲ زمری ۱۴۰۲ه.ش
٢۶ مُحَرَّمُ الحَرام ۱۴۴۵ه.ق
د ننګرهار په خوګیاڼو ولسوالی کې د اسلامیک ریلیف موسسې له لورې د قومي مشرانو او بزګرانو څخه ولسي ګروپونه جوړ شول.
ددغو ګروپونو له ډلې دوه یې د قومي مخورو او دوه ګروپونه د بزګرانو څخه جوړ شوي، چې د بزګرانو په هر ګروپ کې ۹۰ تنه بزګران شامل دي.
یاد ګروپونه د بزګرانو د ستونزو د حل، هڅونې او ارزونې لپاره جوړ شوي؛ ترڅو وړ او ناچاره بزګران په نښه او د اسلامیک ریلیف موسسې له لورې ورسره مرسته وشي.
دغه راز اسلامیک ریلیف مؤسسه به دبزګرانو سره د اصلاح شوي تخمونو، کیمیاوي سرو، د بزګرۍ وسایلواو ګڼو نورو برخو کې مرستې کوي؛ ترڅو بزګران پرځان بسیا او د نورو له احتیاجه خلاص شي.
