د روزګان ولایت د دهراوود ولسوالی د مانده لالی آغا چکدېم رغنیزې چارې پیل شوې
۲۸ تله ۱۴۰۴ هـ.ش
۲۷ رَبِیعُ الْثاني ۱۴۴۷ هـ.ق
د روزګان ولایت د دهراوود ولسوالی د مانده لالی آغا چکدېم رغنیزې چارې؛ کرونده کې د اوبو د تنظیم او د اوبولګولو د نویو ټکنالوژیو رییس مولوي معاذالله عادل، د هغه د مل پلاوي، د روزګان د کرنې ریاست استازو، د دهراوود ولسوالی د استازو او سیمهییزو مشرانو په حضور کې په رسمي ډول پرانیستل شوه.
یاده پروژه ۴۸ متره اوږدوالی او ۶ متره لوړوالی لري، او د نږدې ۵۲ زره او ۵۰۰ مترمکعب اوبو د زېرمه کول وړتیا لري. د دې پروژې قرارداد له یوه خصوصي شرکت سره د ۲ میلیونه او ۴۶۱ زره او ۵۳۰ افغانیو په ارزښت لاسلیک شوی، چې د کرنې، اوبولګولو او مالدارۍ وزارت د پراختیایي بودیجې له لارې تمویلېږي. ټاکل شوې ده، چې دا پروژه به د درو میاشتو په موده کې بشپړه شي.
د دې پروژې د پلي کېدو موخه د ځمکې لاندې اوبو د پیاوړتیا په پار د موسمي اوبو زېرمه کول، د کاریزونو او د اوبولګولو سرچینو پیاوړتیا، د سېلابونو او د خاورې د فرسایش مخنیوی، د اقلیمي بدلونونو د اغېزو مدیریت، او سیمهییزو خلکو لپاره د کاري فرصتونو رامنځته کول دي.
د سیمې اوسېدونکو د یادې پروژې له پرانستې خوښي څرګنده کړه او له مسؤلینو یې وغوښتل، چې د اوبولګولو په برخه کې د لا ډېرو پروژو د پلي کېدو لپاره هڅې زیاتې کړي، څو بزګران وکولای شي خپلې کرنیزې ځمکې پراخې کړي، د حاصلاتو کچه لوړه او د خپلو کورنیو اقتصادي وضعیت ښه کړي.
