هلمند کې د ځمکې غصب مخنیوی او غصب شویو ځمکو د بېرته راګرځولو تخنیکي پلاوي هلې ځلې
د امیرالمؤمنین شیخ هبة الله آخند زاده حفظ الله د حکم په اساس او د کرنې وزارت د هدایت سره سم هلمند ولایت کې د امارتي ځمکو د غصب مخنیوی او غصب شویو ځمکو د بېرته راګرځولو تخنیکي پلاوي عملي چارې له وړاندې پیل شوي دي، چې د مرکز لښکرګاه په شمول په ټولو ولسوالیو کې یی کارونه دوام لري.
په همدې موخه د هلمند دکرنې ریاست اړوند ګوهرګین تکثیري فارم کې لسګونه هغو کسانو چې په نوموړي فارم کې یې خپل سرې کورونه جوړ کړي دي، د کرنې ریاست مرستیال مولوي زین الله زاهد سره په لیدنه کې خپلې ستونزې او مشکلات شریک کړل.
په دې کتنه کې ښاغلی زاهد راغلو کسانو ته وویل: «داچې د ا.ا.ا د مشرتابه د حکم له مخې ټول هغه امارتي ملکیتونه چې اشخاصو او افرادو په بېلابېلو نومونو غصب کړي دي د یادو ملکیتو د تشخیص، تثبیت او له غصب څخه د خلاصولو په موخه تخنیکي پلاوی ته دنده سپارل شوې ده، تر څو په دې برخه کې عملي اقدامات ترسره او راپور یې عالي مقاماتو ته وړاندې کړي، په همدې موخه موږ تاسو مکلف یو چې په دې برخه کې اطاعت ته غاړه کېږدو او د عام المنفعه او امارتي جایدادونو د غصب په خلاصون کې همکاري وکړو.»
ورپسې د راغلو کسانو په استازیتوب څو تنو خبرې وکړې او وې ویل چې، موږ شاخوا ٢١٠ کورونه چې په همدې فارم او شاوخوا سیمو کې بزګري کوو او د یاد فارم پر ځمکه مو کورونه جوړ کړي دي، د نوموړي ځمکې د شخصي ملکیت ادعا نکوو، موږ د ا.ا.ا هر امر او هدایت منو او په اړه یې څنګه چې لازم بولي پر عملي کولو یې توافق لرو.
د یادولو ده، چې هلمند کې د امارتي ځمکو غصب مخنیوی او غصب شویو ځمکو د بېرته راګرځولو تخنیکي پلاوي خپلې هڅې ګړندي کړې دي ترڅو ټولې هغه ځمکې او جایدادونه چې د اسنادو او سوابقو له مخې امارتي وي له غصب څخه خلاصې او په اړه به یې د عالي مقاماتو د حکمونو مطابق کړنې ترسره شي.
