ننګرهار کې د ۳ کانالونو د رغولو چارې په چټکۍ روانې دي
۸ لړم ۱۴۰۱ه.ش
۴ ربیعالثانی ۱۴۴۴ ه.ق
د ننګرهار دکرنې، اوبولګولو او مالدارۍ ریاست چارواکي وایي، چې د ملګرو ملتونو پراختیایي ادارې (UNDP) په مالي او د (ISLAMIC RELIEF) مؤسسې په تخنیکي همکارۍ ددې ولایت د چپرهار ولسوالی د شېخ کلا، ګلدرې او ډاګو کانالونو د رغولو چارې په چټکۍ روانې دي.
د چارواکو په خبره د یادو کانالونو د رغولو ټولیز لګښت ۲۰ میلیونه او ۶۹۳ زره او ۵۰۰ افغانۍ ده، چې په ترڅ کې یې دوه زره او ۲۱۲ فني او غیر فني کسانو ته دکار زمینه هم برابره شوې ده.
د ذکر شویو کانالونو په رغولو سره به په سلګونه جریبه کرنیزه ځمکه خړوبه شي او دسیمې اوسیدونکو ته به پخپلو کروندو کې د کار کولو زمینه هم برابره شي. بزګران به په ځان بسیا او په دي سره به د خوړو خوندیتوب رامنځته شي.
د چپرهار ولسوالی چارواکي وایي، چې د پروژې چارې وخت په وخت له نږدې څخه څارل کېږي او ډاډ ورکوي چې پروژه به په شفافه توګه په خپل وخت بشپړ او ګټي اخستنې ته به وسپارل شي.
