د کرنې او مالدارۍ مرستیال د ملګرو ملتونو د خوړو او کرنې ادارې له چارواکو سره وکتل
۱ غویی ۱۴۰۵ه.ش
۴ ذُو ٱلْقَعْدَةِ ۱۴۴۷ه.ق
د کرنې، اوبو لګولو او مالدارۍ وزارت د کرنې او مالدارۍ مرستیال، مولوي صدراعظم عثماني، دخپل کارپه دفتر کې د ملګرو ملتونو د خوړو او کرنې ادارې له چارواکو سره وکتل او خبرې اترې یې وکړې.
په دې لیدنه کې دواړو لورو د همغږۍ پر دوام، د همکاریو پر پراختیا او د تخمونو، کیمیاوي سرو او د کرنیزو تولیداتو د زیاتوالي په برخه کې د اغېزمنو پروژو پر تطبیق ټینګار وکړ.
د کرنې او مالدارۍ مرستیال د دې ادارې تېرو فعالیتونو ته په اشارې سره وویل، چې په تېرو دوو لسیزو کې د تخمونو د ځان بسیاینې په برخه کې بنسټیز اقدامات نه دي شوي او د بزګرانو اړتیاوې په مطلوب ډول نه دي پوره شوې. نوموړي د یادې ادارې له مسؤلینو وغوښتل، چې پروژې دې په اغېزمن، شفاف او د کرنې سکتور د واقعي اړتیاوو سره سمې عملي کړي.
د ملګرو ملتونو د خوړو او کرنې اداره یو تخصصي بنسټ دی، چې د ملګرو ملتونو تر چتر لاندې فعالیت کوي او د کرنې، مالدارۍ، اوبو مدیریت، تغذیې او اقلیمي بدلونونو په برخو کې کار کوي.
