د شینوارو شپږو ولسوالیو کې د ۶۰ میلیونه افغانیو په ارزښت بېلابېلې پروژې پلي کیږي
۲ مرغومی ۱۳۹۸
د چارو ادارې د تخینکي مرستیال خان ولي خان بشرمل په مشرۍ د بېلابېلو وزارتونو مرستیالانو د ننګرهار والي او سکتوري ادارو مشرانو هسکې مېنې ولسوالۍ کې د قومي مخورو سره د یادو ولسوالیو د ستونزو هوارولو او پراختیایي پلانونو د پلي کولو په موخه ګډه غونډه وکړه.
په دې غونډه کې، چې د کرنې، اوبولګولو او مالدارۍ وزارت د اوبولګولو او طبیعي سرچینو مرستیال حشمت الله غفوري هم ګډون کړی وغونډې ته په وینا کې وویل: «د شینوارو شپږو ولسوالیو لپاره د اوبولګولو د لسو کانالونو تدارکاتي چارې بشپړ شوي دي، چې د جوړولو عملي چارې به یې په نږدې ورځو کې پیل شي.»
ښاغلی غفوري دغه راز وویل، چې د هسکې مینې د درو سربندونو د سروې چارې بشپړ شوي دي او ډېر ژر به یې پاټې چارې هم بشپړ او عملاً به یې د جوړېدو چارې پیل شي، چې پرمټ به یې زرګونه جریبه ځمکه خوړوبه او د کروندګرو د اوبو ستونزه به ورسره حل شي.
د کرنې وزارت د اوبولګولو او طبیعي سرچینو مرستیال وویل، چې ددې وزارت له خوا د شینوارو په ولسوالیو کې د کرنې، اوبولګولو او مالدارۍ په برخه کې د ۶۰ میلیونه افغانیو په ارزښت بېلابېلې پروژې پلي کیږي، چې ورسره به د یادو ولسوالیو د اوسیدونکو په ژوند کې مثبت بدلون راشي.
ښاغلی غفوري د ننګرهار د کرنې سرپرست رییس ته دنده وسپارله چې د دوو اونیو په ترڅ کې د یادو ولسوالیو ستونزې په رسمي ډول د وزارت له مقام سره شریکې کړي، چې د پلان له مخې ورته رسېدنه ووشي.
حشمت الله غفوري د شینوارو ولسونو ته ډاډ ورکړ چې د کرنې وزارت له خوا د کرنیزو چارو د ښه کولو او د شته ستونزو د حل په برخه کې له دوی سره لازمې همکارۍ کیږي.
