د بزګرانو محصولاتو خوندیتوب په پارعملي ګامون؛ میدان وردګو کې معیاري سړه خونه جوړېږي
۸ غبرګولی ۱۴۰۴ ه.ش
۱ ذُو الحِجَّةِ ۱۴۴۶ه.ق
د کرنې، اوبولګولو او مالدارۍ وزارت د کرنیزو محصولاتو د خوندیتوب او بازار موندنې په برخه کې د خپلو هڅو په دوام، د میدان وردګ ولایت په مرکز میدانښار کې د ۵۵ میلیونه افغانیو په ارزښت د ۲۰۰۰ ټنه ظرفیت لرونکې سړې خونې او د مېوو د جالیو فابریکې د جوړېدو بنسټ ډبره کېښوده. دا پروژه، چې د خصوصي سکټور له خوا پر شاوخوا ۵ جریبه ځمکه پلې کېږي، موخه یې د بزګرانو محصولاتو ته د ساتنې، بسته بندۍ او مؤثرې بازارموندنې زمینه برابرول دي.
د یادې سړې خونې د بنسټ ډبرې ایښودو پرمهال د کرنې، اوبولګولو او مالدارۍ وزارت مالي او اداري مرستیال ملا اغا جان اخند«حاجي سالم» وویل، چې د کرنې وزارت هڅه کوي، چې د بزګرانو د محصولاتو لپاره نړۍوال بازارونه پیدا کړي او د خصوصي پانګوالو ملاتړ وکړي. هغه زیاته کړه: « روان مالي کال کې وزارت ۱۴۰ میلیونه افغانۍ بودجه ځانګړې کړې چې له مخې به په اړینو ولایتونو کې سړې خونې جوړې شي.»
د کرنې وزارت مالي او اداري مرستیال وویل: «هڅه مو داده، چې بزګرانو او بڼوالو ته په بېلابېلو برخو کې لا ډېر خدمتونه وړاندې او اسانتیاوې او فرصتونه ورته برابر کړو.»
په ورته وخت کې، د میدان وردګ والي قاري بختیار معاذ وویل:« دا یوه حیاتي پروژه ده، چې د ولایت د بزګرانو د مېوو د خوندیتوب او اقتصادي ودې لپاره ځانګړی اهمیت لري. موږ د خصوصي سکتور دغه نوښت ستایو او د ولایت مقام له لوري هر اړخیز ملاتړ ورسره کوو.»
د میدان وردګو والي زیاته کړه، چې د میدان وردګو په ولایت کې پانګهوالو لپاره د پانګونې غوره زمینه برابره ده او پانګهوال کولای شي، چې د کرنې او مالدارۍ په بېلابېلو برخو کې پانګونه وکړي.
دغه راز، د میدان وردګو ولایت دکرنې رییس الحاج مولوي نیازمحمد عابد وویل، چې دغه سړه خونه د مشتاق کروخي شرکت له خوا جوړېږي، هغه په خپلو خبرو کې د مشتاق کروخي شرکت له مسؤل سره د هر اړخیزې همکارۍ ژمنه وکړه. هغه له شرکت څخه وغوښتل چې خپل فعالیتونه نورو ولایتونو ته هم پراخ کړي.
په همدې حال کې د مشتاق کروخي شرکت مسؤل محمد اسحاق کروخي وویل: «تېر کال مو تازه او وچه مېوه ګاونډیو هېوادونو ته صادره کړه. د میدان وردګو میوې نړۍوال شهرت لري. د همدې بازار پراخولو او د ولایت مقام د همکارۍ له امله مو پرېکړه وکړه، چې دلته سړه خونه جوړه کړو.»
تمه ده چې، دا پروژه د سیمې زرګونه بزګرانو ته د مېوو د ساتنې، بسته بندۍ، او بازارموندنې په برخه کې سترې اسانتیاوې برابرې کړي، د صادراتو بهیر پیاوړی کړي او د کرنیزو تولیداتو ارزښت لوړ کړي.
