ننګرهار کې د لیمو او مالټو د تازه ساتلو او ژوند مودې اوږدولو په موخه څېړنې پیل شوې
ننګرهار پوهنتـون د کرنې پوهنځي ماسترۍ برنامې دوه تنو محصلينو د ليمو او مالټو په تازه ساتلو باندې د الويرا د محلـول اغيزو تر عنوان لاندې څېړنې دننګرهار د کرنې رياست سره په ګډه همکارۍ جلال اباد بڼوالۍ پراختيايي مرکز د مېوو په لابراتوار کې په لاره اچول شوي.
ددې څېړنو په پايله کې به معلومه شي، چې څنګه کولاې شو د الويرا د محلول په مرسته د ليمو او مالټو د ژوند ساتلو موده اوږده کړو ترڅو د زيات وخت لپاره يې کيفيت او تازه والى وساتو.
د ننګرهار د کرنې، اوبو لګولو او مالدارۍ رییس مولوي محمد ولي محسن محصلینو ته د کرنې وزارت د اصولو له مخې په ټولو برخو کې د همکارۍ ډاډ ورکړ.
په همدې موخه د يادو څېړنو څخه دليدنې پر مهال د ننګرهار پوهنتون استادانو ډاکټر عصمت الله درانی او استاد نور علي نور د ننګرهار د کرنې رياست له رهبرۍ څخه مننه وکړه او خوښي يې وښوده چې دواړه رياستونه يو له بل سره ګډه همکاري کوي او دا همکاري به لا دوامداره وي.
د يادولو وړ ده، چې د ننګرهار پوهنتون کرنې پوهنځي بېلابېلو څانګو شاوخوا ۱۵څيړنې د ننګرهار د کرنې رياست په لابراتوارونو او فارمونو کې عملا جريان لري، چې پایلي به يې په نږدې راتلونکې کې شريک شي.
