لغمان کې د کرنې سکتور د همغږۍ میاشتنۍ غونډه دایره شوه
د لغمان د کرنې، اوبولګولو او مالدارۍ ریاست له لوري د سکتوري او تخنیکي همغږۍ میاشتنۍ غونډه د کرنې ریاست مشر الحاج مولوي عبدالستار محمد په مشرۍ جوړه شوه، چې پکې د دې ریاست امرینو او مدیرانو، سکتوري ادارو او د کرنې سکتور اړوند همکارو غیر دولتي مووسسو استازو ګډون درلود.
غونډه د قرآن کریم مبارکو آیتونو په تلاوت پیل شوه. د کرنې ریاست مشر مولوي عبدالستار محمد د غونډې ګډونوالو ته د ښه راغلاست ویلو ترڅنګ څرګنده کړه، چې دا غونډه د همغږۍ، شفافیت، او متوازن انکشاف د لا ښه پلي کېدو په موخه دایره شوې، ترڅو د ولایت په لرې پرتو سیمو کې بزګرانو او مالدارانو ته عادلانه او شفاف خدمتونه وړاندې شي.
نوموړي اړوندو همکارو مؤسسو ته سپارښتنه وکړه: چې د مستحقینو د سروې او مرستو وېش چارې د کرنې ریاست سره په همغږۍ ترسره کړي، خپل پلانونه او پروګرامونه په وخت سره شریک کړي او د پروژو د تطبیق څخه وړاندې اړوند اسناد د کرنې وزارت سره بشپړ کړي.
د غونډې په جریان کې د پلان او برنامو د همغږۍ مدیر عبیدالله قریشي د "موج ویژن" تر عنوان لاندې نندارتون د ګډون شرایط او کړنلاره له ګډونوالو سره شریکه کړه، چې د روان کال د لیندۍ میاشتې له شلمې تر دوه ویشتمې نیټې پورې به دوام وکړي.
د غونډې د اجنډا پر بنسټ، د افغانستان لپاره د هالنډ کمېټې، د خوړو او زدهکړې نړیوالې مؤسسې، د راتلونکو نسلونو مؤسسې، ای.بي.ام مؤسسې، ډاکار، او اسلامیک ریلیف موسسو استازو، همدارنګه د کلیو بیارغونې او پراختیا، چاپیریال ساتنې، او اقتصاد ریاستونو استازیو خپل کاري راپورونه، راتلونکي پلانونه، او د کار په ساحه کې شته ستونزې د غونډې له مشرتابه سره شریکې کړې.
په پای کې د ستونزو د حل او د راتلونکو پلانونو د ښه تطبیق په موخه اړین تصمیمونه ونیول شول، او د مشرتابه له لوري ټولو ګډونوالو ته د بشپړ ملاتړ ډاډ ورکړل شو.
