د هلمند دوو ولسوالیو کې له یوشمېر کروندګرو و مالدارانو سره مرستې وشوې
۲۳ زمری ۱۴۰۲ه.ش
۲۷ مُحَرَّمُ الحَرام ۱۴۴۵ه.ق
د هلمند ولایت د کرنې، اوبو لګولو او مالدارۍ ریاست لخوا، د افغانستان لپاره د هالنډ کمیټې یا ډی سي اي مؤسسې په مالي همکارۍ ددې ولایت د ګرمسېر ولسوالی ١٨٠ تنو بزګرو سره د کیمیاوي سرو مرسته وشوه .
ددي مرستو په لړ کي هر بزګر ته ۵۰ کيلو ګرامه سپینه سره ورکړل شوی دی.
ديادوني وړ ده، چې يادو بزګرانو ته تر دې وړاندې د انساني قاچاق او نورو ملکونو ته دغير قانوني مهاجرت د زيانونو، دکرني په برخه کي داوبو لګولو، کيمياوي سرو استعمال او کرنیز تناوب په اړه عامه پوهاوی هم ورکړل شوي دي.
په همدې حال کې د هلمند ولایت د کرنې، اوبولګولو او مالدارۍ ریاست لخوا، د ملګرو ملتونو د نشه یي توکو او جرایمو پر وړاندې د مبارزې دفتر په مالي او له افغان کډوالو سره د مرستې لپاره د ډنمارک کمیټې (ډاکار) په تخنیکي همکارۍ دهلمند ناوې ولسوالی کې ٩٠ تنو بزګرو او مالدارنو ته د مالدارئ اړوند د روغتیا ساتنې توکي وېشل شوي دي
ددې مرستې په لړ کې د موسی زیو، خرابې او سلطانزیو سیمو کې هر بزګر او مالدار ته چې مخکې د غواګانو لپاره ورته غوجلې هم جوړې شوې وې دامهال ورته موزې، دستکشې، له پراشوټ څخه جوړ کالي، صابون او ګلسرین ورکړل شوي دي.
د یادولو وړ ده چې نوموړیو بزګرو او مالدارانو ته د حفظ الصحې په اړه عامه پوهاوی هم ورکړل شوي دي.
ددغو مرستو موخه د کروندګرو او مالدارانو اقتصادي وده او په ټوله کې د کرنې او مالدارۍ سکټور پراختیا ته زمینه برابرول دي.
