۱۸ چنګاښ ۱۳۹۹

د کرنې، اوبولګولو او مالدارۍ وزارت د اوبولګولو او طبیعي سرچینو مرستیال حشمت الله غفوري؛ د ولسمشر د سپارښتنې پر اساس د یوې پلاوې په مشرۍ، چې د جمهوري ریاست د پانګونې د اسانتیاوې واحد، د سوداګرۍ او صنایعو وزارت او د ښار جوړونې او ځمکو وزارت استازي، او د سوداګرۍ خونې استازی په کې ګډون درلود، د کندهار ولایت د کانونو او پانګونې خونې او یوشمېر سوداګرو، صنعت کارانو او پانګوالو سره وکتل، ترڅو ددې ولایت د کرنیز کمپلکس د جوړولو په پار د ځمکې ستونزه وارزوي او حل لار ورته پیدا کړي.

په ورته وخت کې د کرنیز کمپلکس د ځمکې د ستونزې د هوارولو په پار، یاد پلاوې ددې کمپلکس د جوړېدو له سیمې لیدنه وکړه او له سیمه ییزو چارواکو سره یې خبرې اترې وکړې.

د کرنې، اوبولګولو او مالدارۍ وزارت د اوبولګولو او طبیعي سرچینو مرستیال حشمت الله غفوري د کرنیز کمپلکس د اهمیت په هکله خبرې وکړې او وویل: د ځمکې ستونزه وارزول شوه، حل لاره پیدا شوې او د ستونزې د هوارولو په پار د جمهوري ریاست عالي مقام ته وړاندیز کیږي.

ښاغلی غفوري وویل، چې کندهار یو کرنیز ولایت دی او د کرنې وزارت هم ددې ولایت لپاره بېلابېل بنسټیزې پروژې او نور موارد په پام کې نیولي دي.

د کرنې وزارت د اوبولګولو او طبعیي سرچینو مرستیال وویل، چې د کندهار کرنیز کمپلکس د خصوصي سکټور په پانګونې او د حکومت په ملاتړ سره جوړیږي. کوم کرنیز کمپلکس چې جوړیږي، سړې خونې، مجهز لابراټوار، د پروسس مرکزونه او ټول هغه اسانتیاوې چې اړین دي په کې شامل دي.

په همدې حال کې د کندهار والي حیات الله حیات، کندهار ته ددې پلاوې له سفر څخه د مننې ترڅنګ وویل، دوی چمتو دي، چې د کمپلکس د ځمکې د ستونزې په هوارولو کې مرسته وکړي، ځکه یاد کمپلکس د کندهار د صنعت کارانو ستونزې هواروي.

په همدې توګه د کندهار ولایت د کانونو او صنایعو خونې مشر سعدالدین سعید خبرې وکړې او وویل، چې د نوي کمپلکس جوړېدل، د سوداګرو او صنعت کارانو ستونیزې هواروي، ځکه په دې کمپلکس کې محصولات پروسس او تولیدات معیاري کیږي.

دغه راز په یوه بېله غونډه کې د کرنې وزارت د اوبولګولو او طبیعي سرچینو مرستیال حشمت الله غفوري او ور سره مل پلاوې له خوا د کندهار د پانګوالو او په ځانګړې توګه د کرنې په سکټور کې د سوداګر او پانګوالو ستونزې او ننګونې وارزول شوې.